അന്നോരാ മേടപ്പുലരിയില്‍ -
അരിയും പഴങ്ങളും കോടിമുണ്ടും,
കണിക്കൊന്നയും പൊന്നും പണവും,
ചേലില്‍ നിരത്തിയോരാത്താലവും,
ഏഴുതിരികൊളുത്തിയ നിലവിളക്കും,
ഏഴഴകുള്ള മയില്‍പീലി ചൂടിയെന്‍
കാര്‍മുകില്‍ വര്‍ണ്ണന്‍റെ തിരുവുടലും ,
കണികണ്ടു ഞാന്‍ ഉണരുന്നതും,
എന്നച്ഛന്‍ നല്‍കുന്ന കൈനീട്ടമത്രയും-
ഇരുകൈക്കുടന്നയില്‍ വാങ്ങി വണങ്ങുമ്പോള്‍,
തൊഴുകൈയ്യുമായെന്‍റെ കണ്ണന്‍റെ മുന്നിലായ്‌
നന്മായ് ,ശ്രീയായ് ,ലക്ഷ്മിയായ് -
പൊന്‍കസവുടുത്തോരമ്മതന്‍ മുഖവും ,
തൂശനിലയില്‍ വിളമ്പും വിഷുസദ്യയും,
എന്നുമെന്‍ ഓര്‍മ്മതന്‍ പീലിത്തടങ്ങളില്‍
നിറകണിയായ് നിറഞ്ഞീടവേ ..
ഇന്നിതാ ഒരു വിഷു കൂടി...!!
അങ്ങകലെയെന്‍ ഓര്‍മ്മകള്‍ പൂക്കുന്ന നാട്ടില്‍ ....
ഇന്നവിടെ വിഷു പുലരുമ്പോള്‍,
കണിക്കൊന്നകള്‍ പൂക്കുമ്പോള്‍ ,
ഇവിടെയീ മീനം മാഞ്ഞുപോകുന്നതും -
മേടം അണഞ്ഞതും അറിയാതെ -
കൊന്നപൂക്കുന്നതും കണിഒരുങ്ങുന്നതും
കണ്ടീടാതെ ,
വിഷുപക്ഷിപാടിയതും,
വിഷുപുലരി വന്നു വിളിച്ചതും
കേട്ടീടാതെ -
കാലങ്ങള്‍ക്കിപ്പുറം കാതങ്ങള്‍ക്കപ്പുറം
ഈ ഞാനും ....!
ഏതു നാട്ടിലാകിലും;
എന്നും പുലരട്ടെ നന്മ തന്‍ വിഷു ....
എങ്ങും കേള്‍ക്കട്ടെ വിഷുപക്ഷിതന്‍
സ്നേഹ ഗീതം...
